Soror Birgitta, abbatissa, nec non frater Ruthgerus, confessor generalis, ceterique fratres et sorores utriusque conventus monasterii Mariendal ordinis sancti salvatoris, alias sancte Birgitte nuncupati, prope Revaliam strennuo ac valido viro Erico Thursson militi et honorabili Gundell, sue conthorali, eorumque filiis et filiabus presentibus et futuris, quos cunctipotens sua gracia donare dignabitur, nobis totique congregacioni nostre in Christo sinceriter dilectis, salutem cum oracionum devotarum suffragiis complurimis. Exigente vestra circa nos et monasterium nostrum pia affectione vos tanquam speciales amicos et benefactores in nostram favorabiliter recipimus fraternitatem per presentes, dantes et concedentes vobis in nomine Domini plenam tam in vita quam in morte vestra participacionem omnium bonorum, videlicet missarum, orationum, vigiliarum, abstinenciarum, disciplinarum et jejuniorum ceterorumque piorum ac religio[so]rum exerciciorum, que per nos ac posteros nostros salvatoris clemencia operabitur, adiicientes de gracia speciali, ut cum obitus vester, quem Deus felicem faciat, nobis intimatus fuerit, pro animarum vestrarum remedio salutari apud nos prout nobiscum pro confratribus et sororibus ordinis nostri memoria per vigilias missasque fieri consuetum est peragetur. Datum loco quo supra anno Domini millesimo quingentesimo quarto, feria secunda post omnium sanctorum, nostri conventus sub sigillo in testimonium premissorum.
No comments:
Post a Comment