Anna van der Meulen's letter to Maria van der Meulen, dated September 7, 1584

Source:

Brieven en andere bescheiden betreffende Daniel van der Meulen 1584-1600, edited by Gisela Jongbloet-Van Houtte

http://resources.huygens.knaw.nl/retroboeken/meulen/#source=1&page=524&accessor=toc

The letter:

Aen de wijse ende eerbare jonfrou jonfwrau ende jongedochter, mijn seer lieve suster tot Antwerpen.

Frankfurt, 7 september 1584
Mijn seer lieve ende uutverkorren suster Maria, ick ghebiede mij van ghehelder herte tuwaert. Ick wense U. L. wrede van Godt den Vader doer onsen Heere Jsom Kristom. Ick late U weten dat ick al wel te passe ben, desgelijckx och mijnnen lieven man ende onse lieve kinderkens. Wilde wel, seer lieve suster, dat also met U. L. ock warre dan ick hebbe met grooter drofheyt uut ons broeders schrijven vernommen dat U. L. seer swack ende kranck sijt. Mijn hertte is soe seer bij U. mijn wyrde suster, dat ick somttijs met goeder herten teghens mijnnen mans segghe, wan hij mij toelaten wielde te treckken, ick en soude ghen perryckelen aensien om bij U. L. te komen, mijn ghewenste suster. Nu den tijt en wiel alsuelcke niet lijden. Als ist bijaldien dat wij met den lichamme verschijden sijn, soe is mijn gemoet ende hertte altijt bij U. L. daert tot ghennen daghe van gheschijden en sal sijn.

Soe, mijn lieve wyrde suster, nu het den Herre belieft heft U vaderlijck te besoeken, soe bidde ick U. L. vriendelijck, mijn uutverkorren suster, nemmet doch also met ghedult aen ende mackt doch eenen goden moet want ghij sijt doch verserkert dat de Herre sijnne kienderen niet toe en schieckt tensij dan haer ten besten ende tot haerder sallichheyt ende Hij kastijt een igelijcken soen dien Hij aennemt. Soe mijn lieve suster sijt wast versekkerd dat U de Herre lief heft ende dat ghij ghewisselijck een van sijn uutwerkorren kienderen sijt hoewel, seer lieve suster, dat ick wel wet dat het den wlechse swaer valt. Ick bidde den Herre dat Hij au afnemen wiel dat U te swaer is, bevelende U. L., mijn seer wyrde suster, in Goddes bewaringhe, Hem biddende U. L. gesontheyt te gheven soe Hij wet dattet U salich is. U. L. believe mijnne hertgrondieghe rekommandacie te doen aen onse seer lieve eerwyrdieghe moeder, broeders ende susters met samt aen onsen lieven soen.
Uut Franckfoert desen 7en september anno 1584,
U. L. dienstwiellieghe traue suster
Anna van der Molen