Source:
Brieven en andere bescheiden betreffende Daniel van der Meulen 1584-1600, edited by Gisela Jongbloet-Van Houtte
http://resources.huygens.knaw.nl/retroboeken/meulen/#page=224&accessor=toc&source=1
The letter:
Den eersaemen, seer voorsienige Sr. Daniel vander Meulen tot den huyse van Jacop Schot. Delft.
Antwerpen, 29 oktober 1584
Eersaeme gonstighe seer lieve broeder, Alsoo wij op heden, door onsen neve Phlips de Hoest alsoock tevoren door Uwe brieven die jonger waeren, van Uwe gesontheyt verstaen hebben sijn wij daerdoor verblijdt geweest. Bidden den Heere U lange daerinne te gespaeren. Wij alhier met saemen onse seer lieve moeder sijn oock Godt loff in redelijck goeden doene wtgenomen onse lieve suster Marie; die is noch al inden selven droeven staedt als doen U. L. van hier trock ende de hope tot verlichtinge is seer cleyne wandt iegelijck oordeelt haere sieckte voor een rechte teiringe. Sij swackt alle daege ende de borst benaut haer soo, dat somwijlen schijnt dat sij geenen adem crijgen en can. De medecijnen seggen dat het door de loose compt, welcke aen de vleugelen verdroocht ende daerdoor alsoo opwaerdts stijget.
Over drij daegen, gelijck sij dicwils beuckachtich is, alsoo oock doen ende inde plaetse dat andermaelen wit schuym is dat se overgeeft, alsoo spoudense doen wel eenen lepel vol claer bloedt. Juffrou van Hoorne quam haer besoecken soo dat geschiede, ende die vertrock ons van haeren broeder, welcken overlede van deselve sieckte teweten een teiringe, als hij dat even dat bloetspouwen drijmael hadde vóór sijn overlijden. De Heere wil onse lieve suster geven wat haer aldersalichst is. Het staet al in Sijnen handen maer het is droeflijck aen te sien soo langhen sieckte insonderheyt aen die men soo lieff heeft; jae mij en dunckt niet, dat die het niet aen en gaet oft noyt geproeft en hebben, bedencken connen wat grooter hertenleedt dattet is. Doch soo moeten wij ons alle den wille Gods onderworpen ende de verstandighe leeren haer daerinne schicken wandt Hij ons alle naer Sijne wijsheydt regiert ende weet alleen wat ons van noode is.
Voorder, lieve broeder, verstaen wij dat U. L. van meyninge is corts herwaerdts te comen, welck onse lieve moeder geensins geraeden en vindt, insonderheyt soo lange als ghij Uwe voorgenomen saecke niet ten effecte gebrocht en hebt. Raedet U daerom niet te comen maer U doch daer te houden totten wtganck dier saecken. Tot dien eynde seynden oft hebben wij op eergisteren gesonden per schipper Geert Janssen, die se noemen den Admirael, een coffer opdat U. L. daermede geaccomodeert mocht wesen om U cleederen, aldaer sijnde, te sluyten. Daer is inne, als U. L. in dese bijleggende memorie sien mach. U believe 't gene dat wij genaeyt hebben niet te ontdoene maer alsoo in 't coffer te laeten leggen want d'eene compt monfrer Andries ende Pierens toe, ende d'ander hoewel dat U. L. hemden ende snutdoecken sijn, soo laet se nochtans alsoo bijeen wandt het is beter dat Lodewijck die ander, die U. L. daer heeft, soo vele te dickwilder doen wasschen; soo een worter geen aff verloren. U believe Lodewijck oock te seggen dat bij de snutdoecken die U. L. mede droech eenen meer is dan hij op sijn memorie heeft, welcken was in den sack van U. L. geusbocxen blijven steken. De sleutels totte kiste sijn dese innegesloten. De moetsen, oft iedt dat U. L. niet te gebruycken en heeft, mach U. L. in 't malet sluyten om alsoo het coffer te bequaemer te mogen gebruycken.
Daer is een cleyn cofferken in, massoeur Susanna toebehoorende, welck U. L. mach nicht Schot in haere bewaeringe geven. Oock isser inne een platte doose, sijnde de brieven vande geestelijcke goederen. U. L. mach die cousijn Schot geven op te sluyten indien het U goet dunckt. In de doose metten hoet, die ick voor U. L. hebbe laeten maecken, leyt eenen brieff. U believe die Lodewijc te doen bestellen.
Niets anders op dese tijdt dan, bevelende U in de bescherminge des Heere, bidde Hem U mijn lieve broeder te geven in gesontheyt een lanck gelucksalich leven ende het volbrengen Uwer goeder begeirten. Onse seer lieve moeder ende onse susteren, insonderheyt onse suster Marie, doen U seer groeten. Monfrer is in den Breeden Raet ende en weet van brenger deses niet. U believe ons groete aen de vrinden aldaer niet te vergeten ende wilt de mijne t'Uwaerts ontfangen als van die haer geheel herte ende al wat sij heeft voor U is.
In Antwerpen addi 29en october anno 1584,
de al Uwe dinstwillige suster wat ick vermach
Sara van der Meulen
No comments:
Post a Comment