Source:
The Stonor letters and papers, 1290-1483, volume 1, edited by Charles Lethbridge Kingsford, Offices of the Society, London, 1919
The letter:
Syr, I recommande me unto yow as lowly as I cane: plesyt yow to wyte I have ressevyde a byle frome yow wherby I undyrstonde My lorde Morlay dissyrres to sugiorne with yow: what answere þat ye have ȝevyn hym I cannot undyrstond be your bylle: I sopose your mynid was apon sum odyr matyres when þat ye wrotyt, bot and ye have not granttyde, I beseke yow to aschusyt and to contend your litylle abyddynge at home, and allso þe joberde of yowr chelder and all of your howys at your hasty goyng in to Devenscheyr: for and your abyddyng at home be no nodyrwyse þan yt ys, þat wolle be [non]e profete unto yow and hertes ese unto me: raythere breke up housallde þan take sugiornantes, for servantes be not so delygent as þei were wonto bee. Now farewelle, goode syr, and Gode ȝeve yow goode nyghte and brynge yow welle home and in schorte tyme. Wrytyn at Stonor apon Sante Symon and Judes daye at eve.
Be your awne Jayn Stonor.
[In dorso] Ples yt yow to be remembyrde apon genciayn, ruberbe, bays, cappys, pouttys, cheverellasseys, a nounce of flayt selke, lasses, tryacyl.
To my brodyr Stonor in hast, at þe Swerde in Fletestrete.
No comments:
Post a Comment